La Marcho di rèi

De matin, Ai rescountra lou trin De tres grand rèi qu’anavon en vouiage ; De matin, Ai rescountra lou trin De tres grand rèi dessus lou grand camin. Ai vist d’abord De gardo-corp, De gènt arma em’uno troupo de page ; Ai vist d’abord De gardo-cors, Touti daura dessus si justo-corp. Li drapèu, Qu’èron segur fort bèu, I ventoulé servien de badinage ; Li camèu, Qu’èron segur fort bèu, Pourtavon de bijou touti nouvèu. E li tambour, Pèr faire ounour, De tèms en tèms fasien brusi soun tapage ; E li tambour, Pèr faire ounour, Batien la marcho chascun à soun tour. Dins un char Daura de touto part, Vesias li rèi moudèste coume d’ange ; Dins un char Daura de touto part, Vesias bria de riche-z-estendard ; Ausias d’auboues, De bèlli voues Que de moun Dièu publiavon li louange ; Ausias d’auboues, De bèlli voues Que disien d’er d’un amirable choues. Esbahi D’entèndre acò d’aqui, Me siéu renja pèr vèire l’equipage ; Esbahi D’entèndre acò d’aqui, De luèn en luèn li-z-ai toujou suivi ; L’astre brian Qu’èro davan Servié de guido e menavo li tres mage ; L’astre brian Qu’èro davan S’arrestè net quand fuguè vers l’enfant. Intron pièi Per adoura soun rèi, A dous ginoun coumençon sa priero ; Intron pièi Per adoura soun rèi E recounèisse sa divino lèi. Gaspard d’abord Presènto l’or E di : « Moun Diéu, sias lou soulé rèi de glòri. » Gaspard d’abord Presènto l’or E dis pertout que vèn cassa la mort. Per presèn Melchior oùfro l’encèn En ié disen : « Sias lou Diéu di-z-armado. » Per presèn Melchior oùfro l’encèn, Disen : « Sias rèi e sias Diéu tout ensen. » La paureta, L’umulita, De voste amour nin soun li provo assurado ; La paureta, L’umulita N’empachon pas vosto Divinita. Quant à iéu, N’en plour, moun bon Diéu ! En sangloutant vous presènte la mirrho ; Quant à iéu, N’en plour, moun bon Diéu ! De ié sounja, siéu pu mort que viéu ; Un jour, per nous, Sus uno croux, Coumé mourtau, fenirés nosti misèro ; Un jour, per nous, Sus uno crous, Devès mouri per lou salut de tous. Aujourd’huèi Es adoura di rèi E bateja di man de Jan-Batisto ; Aujourd’huèi Es adoura di rèi, Tout l’univer se soumés a sa lèi. Dins un festin Rènd l’aigo en vin : Aquèu miracle es segur bèn de requisto ; Dins un festin Rènd l’aigo en vin : Nous manifèsto soun poudé divin.