Lou Porto-aigo

En Arle, au tèms di Fado, Flourissié La rèino Pounsirado, Un rousié ! L’emperaire rouman Ié vèn demanda sa man; Mai la bello en s’estremant Ié respond: Deman! - O blanco estello d’Arle, Un moumen ! Escoutas que vous parle Umblamen ! Pèr un de vòsti rai Vous proumete bèn verai Que ço que voudrés farai, O que mourirai. - Eh ! bèn, diguè la rèino, Siéu à tu, E jure, malapèino ! Ma vertu, Que tièuno siéu de-bon S’à travès Crau e Trebon De Vau-cluso sus un pont M’aduses la font. Ravi de la demando, Éu s’envai, E tout-d’un-tèms coumando Lou travai: Cènt milo journadié, Terraioun coume eigadié, Lèu se groupon i chantié, Paston lou mourtié. Aturon vau e baisso Niuech e jour; Mau-grat lis antibaisso, Van toujour; Lou plan es bèn traça; Lou valat es enqueissa, Betuma, cubert, caussa: L’aigo pòu passa. Esvèntron li mountiho, Li touret; A travès dis Aupiho Tiron dre: L’espetaclous eigau, Lou porto-aigo sènso egau, Sus l’estang de Barbegau Marcho que fai gau. En Arle enfin la Sorgo, O bonur ! Un bèu matin desgorgo Si flot pur: Au toumbant clarinèu, En trepant coume d’agnèu, Tout un pople palinèu Béu à plen bournèu. - Vaqui, bello princesso, Lou coundu: Sènso repaus ni cesso L’ai adu... Ai espera sèt an; E pèr querre l’Eridan Se n’en fau encaro autant, Reparte à l’istant. - Merci , grand emperaire, Sias trop bon ! Mai au sòu poudès traire Voste pont: l’a ’n pichot barralié Que iéu ame a la fouliè E que m’adus l’aigo au lie. Adiéu, cavalié ! Lou prince miserable Mouriguè; Lou porto-aigo amirable Periguè... Jouvènt, anas-ie plan Em’aquéli bèu semblant, Car la fe dóu femelan Passo gaire l’an.