La Rèino Jano

A William C. Bonaparte-Wyse Fiéu de Maiano, S’ère vengu dóu tèms De Dono Jano, Quand èro à soun printèms E soubeirano Coume èron autre-tèms, Sènso autro engano Que soun regard courous, Auriéu, d’elo amourous, Trouva, iéu benurous, Tant fino cansouneto Que la bello Janeto M’aurié douna ‘n mantèu Pèr parèisse i castèu. Quand dins Averso, Di courtisan marrit La man perverso I’estranglè soun marit, De part diverso Contro elo mountè ‘n crid Aut coume uno erso... Mai iéu, dins mi cansoun, Emé rimo e resoun Auriéu la trahisoun Talamen esclargido Que la Rèino aléugido M’aurié douna ‘n chivau Pèr courre amount, avau. Quand la Sereno Un jour pièi desbarquè Sus nosto areno E que trelusiguè, Bèuta sereno, E risènto abauquè Malan e reno: - “Oh ! i’auriéu di, Venus, A Naple tournes plus, Qu’empourtariés la lus, L’amour e la richesso ! » E m’aurié la princesso Douna lis esperoun, E titre de baroun. Raubo pourpalo, Courouno d’or au front, A flour d’espalo Pourtant lou mantèu long, En court papalo Sus la Roco de Dom, Quand fièro e palo Fè pièi de si malur Lou dedu clar e pur, Auriéu crida segur: “Vivo la Rèino Jano ! » E qu saup ? abelano, M’aurié sus si detoun Leissa faire un poutoun. Alor, amado ! Dins ta Prouvènço - leu Abrasamado, Auriéu mougu belèu Uno flamado, La flamo dóu soulèu, Contro l’armado Que te despouderè; E coume antan di Grè La terro s’enaurè E d’eros fuguè pleno Pèr la bèuta d’Eleno, O Jano, ansin pèr tu Ferme aurian coumbatu ! Liegènt lou Mounge, Aquéu dis Isclo d’Or, Vaqui lou sounge Que fai souvènt moun cor. Dès fes sus vounge, Me sèmblo qu’an li mort Mens de vieiounge Que li vivènt d’encuei; Car dins tout soun ourguei Lou siècle mor d’enuei; E sènso li chatouno Qu’à bèl èime nous douno Lou Benfatour divin, La joio prendrié fin. Mai li pageso Entèndon gaire i vers, E li bourgeso Coumprenon de-travers. La lèi franceso A tout mes à l’envers: Nòsti marqueso, Nòstis emperairis, Mau-grat gèu e tèms gris, Vuei rèston à Paris; E moun amo idoulatro Vers Jano o Cleoupatro, Fauto d’autre alimen, Trèvo amourousamen.