La Bello d'Avoust

I Margai de Vau-meirano, Trefoulido d’amour, Davalo dins la plano, Dos ouro davans jour. En descendènt la colo, Es folo: - Ai bèu, dis, lou cerca, L’ai manca... Ai ! tout moun cor tremolo. Roussignoulet, cigalo, teisas-vous ! Ausès lou cant de la Bello d’Avoust Margai es tant poulido Que dins lou nivoulan La luno ennivoulido Au nivo a di bèn plan: - Nivo, bèu nivo, passo, Ma faço Vòu leissa toumba ‘n rai Sus Margai: Toun sourne m’embarrasso. Roussignoulet, cigalo, teisas-vous ! Ausès lou cant de la Bello d’Avoust. L’aucèu, dins la genèsto Que brèsso si pichoun, Alongo un pau la tèsto Pèr vèi soun mourranchoun; Mai de vèire que plouro, S’aubouro, E pèr la counsoula I’a parla Belèu mai de miechouro. Roussignoulet, cigalo, teisas-vous ! Ausès lou cant de la Bello d’Avoust. Enjusquo la luseto Que lusi - Pauro fiheto, Pren moun lume, se vos ! Cerques toun calignaire Pecaire, L’aguèsses di pulèu, Moun calèu Sarié ‘sta toun menaire. Roussignoulet, cigalo, teisas-vous ! Ausès lou cant de la Bello d’Avoust, II Margai de Vau-meirano Fai tant do vai-e-vèn Qu’à l’oumbro d’uno andano A trouva lou jouvènt. I’a di: - Desempièi l’aubo, Ma rauto Se bagno de mi plour: Que d’amour Pèr aquéu que me raubo ! Roussignoulet, cigalo, teisas-vous ! Ausès lou cant de la Bello d’Avoust. La luno me guinchavo, E d’un biais pietaclous L’aucoloun me parlavo De tu, moun amourous; Enjusquo la luseto, Braveto, Voulié de soun cousta Me presta Sa pichoto viheto. Roussignoulet, cigalo, teisas-vous ! Ausès lou cant de la Bello d’Avoust. Mai toun front es bèn sourne ! Dirias que sies malaut... Bellas, vos que m’entourne A moun oustau peirau ? - S’ai tant la caro tristo, Ma fisto, Es qu’un negre tavan En trevant M’a ‘spavourdi la visto. Roussignoulet, cigalo, teisas-vous ! Ausès lou cant de laBello d’Avoust. - Ta voues, douço coume èro, Vuei sèmblo un tremoulun Que trono souto terro... Iéu n’ai de frejoulun. - Se ma voues es tant rauco, Viedauco, Es que pèr t’espera, M’ère tra L’esquino sus la bauco. Roussignoulet, cigalo, teisas-vous ! Ausès lou cant de la Bello d’Avoust. - Mouriéu de languitòri, Mai aro es de la pòu: Un jour de raubatòri, Bellas, as mes lou dòu ! - Se moun jargau soumbrejo, Negrejo, La niue noun fai pas mens, E pamens La niue tambèn clarejo. Roussignoulet, cigalo, teisas-vous ! Ausès lou cant de la Bello d’Avoust III Quand l’estello dou pastre Coumencè de pali, E que lou rèi dis astro Anavo tressali, Tout d’un-cop se raubèron, Sautèron Sus un negre chivau, E d’avau Ensèmble partiguèron. Roussignoulet, cigalo, teisas-vous ! Ausès lou cant de la Bello d’Avoust. E lou chivau landavo Sus lou camin peirous, E la terro brandavo Souto lis amourous; E dison que li masco Fantasco Dansèron à l’entour Jusqu’au jour, En risènt coume d’asclo. Roussignoulet, cigalo, teisas-vous ! Ausès lou cant de la Bello d’Avoust. Adounc la luno blanco S’ennivouliguè mai; L’auceloun sus la branco S’envoulè de l’esfrai; Enjusquo la luseto, Paureto, Amoussé soun calèu, E lèu, lèu, S’amatè dins l’erbeto. Roussignoulet, cigalo, teisas-vous ! Ausès lou cant de la Bello d’Avoust. E dison qu’à la noço De la pauro Margai, Se taulejè pas foço, Se riguè gaire mai; E dison que li fianço, Li danso, Fuguèron dins un liò Ount lou fiò Se vesié di fendanço. Roussignoulet, cigalo, teisas-vous ! Ausès lou cant de la Bello d’Avoust. Valoun de Vau-meirano, Camin di Baus, jamai Pèr colo ni pèr plano Veguerias plus Margai. Sa maire dis sis Ouro E plouro; E noun vòu s’assoula De parla De sa bello pastouro. Roussignoulet, cigalo, envoulas-vous ! Vaqui lou cant de la Bello d’Avoust.