The Renegade

I Jan de Gounfaroun, pres pèr de coursàri, Dins li Janissàri Sèt an a servi: Fau, encò di Turc, avè la coudeno Facho à la cadeno Emai au rouvi. Béure l’alegresso Em’uno mestresso Es de Mahoumet la felecita; Mai sus la mountagno Manja de castagno Vau mai que l’amour sènso libérta. Jan de Gounfaroun perdeguè paciènci, E de sa counsciènci Faguè bon marcat... Ah ! perdounas-ie, Segnour adourable ! Aquéu miserable Es un renegat ! Béure l’alegresso Em’uno mestresso Es de Mahoumet la felecita; Mai sus la mountagno Manja de castagno Vau mai que l’amour sénso liberta Jan de Gounfaroun lèu faguè fourtuno, Car la Miejo-Luno I fourban sourris; E coupè de còu, belèu mai de milo. E brulè de vilo Coume un antecrist. Béure l’alegresso Em’uno mestresso Es de Mahoumet la felecita; Mai sus la mountagno Manja de castagno Vau mai que l’amour sènso liberta. II Dison qu’en estènt generau d’armado, La tèslo enramado Emé de lausié — La fiho dou réi, poulido e courouso, E d’éu amourouso, Un jour ie disié . « Béure l’alegresso Em’uno mestresso Es de Mahoumet la felecita; E sus la mountagno Manja de castagno Vau mens que l’amour sènso liberta. “Ai dins moun jardin uno verdo teso: L’auro pounenteso Ié canto à l’entour, L’aureto de mar, l’auro fresqueirouso, Que di tuberouso Escampo l’óudour. “ Béure l’alegresso Em’uno mestresso Es de Mahoumet la felecita; E sus la mountagno Manja de castagno Vau mens que l’amour sènso liberta. “l’a, souto la teso, un banquet de mabre Contro un argelabre: Te i’ espère aniue. Iéu te mandarai moun vièi esclau negre: N’as que de lou segre En barrant lis iue. “Béure l’alegresso Em,uno mestresso Es de Mahoumet la felecita; E sus la mountagno Manja de castagno Vau mens quo l’amour sènso liberta.” III Quau vous a pas di qu’estènt à l’espèro De l’ouro prouspèro Sus lou ribeirés, Jan, d’un bastimen preste au descampage Entènd l’equipage Canta marsihés: Béure l’alegresso Em’uno mestresso Es de Mahoumet la felecita: Mai sus la mountagno manja de castagno Vau mai que l’amour sènso liberta. Coume l’aigo gisclo ,à-n-un cop de remo, Un flot de lagremo Crèbo soun cor dur; Lou despatria pènso á la patrio. E se desvario D’èstre emé li Turc Béure l’alegresso Em’uno mestresso Es de Mahoumet la felecita; Mai sus la mountagno Manja de castagno Vau mai que l’amour sènso liberta. E sèns demanda quant vau ni quantcosto, Vitamen acosto Lou pichot lahut; E laisso la bello à soun banc de mabre, Lou turban, lou sabre, E tout lou bahut. Béure l’alegresso Em’uno mestresso Es de Mahoumet la felecita; Mai sus la mountagno Manja de castagno Vau mai que l’amour sènso liberta. Pièi, coume partié, dre sus la tartano: “Adiéu , ma sultano ! Diguè lou fena; As fa’n paradis de moun purgatòri, Mai, dóu languitòri, Me fau enana. « Béure l’alegresso Em’uno mestresso Es de Mahoumet la felecita; Mai sus la mountagno Manja de castagno Vau mai que l’amour sènso liberta ! » Car nosto Prouvènço es talamen bello Que se la rapello Tau que noun lou crèi: Nous amourousis e nous descounsolo, Levant de cassolo Li fiho de rèi. Bèure l’alegresso Em’uno mestresso Es de Mahoumet la felecita; Mai sus la mountagno Manja de castagno Vau mai que l’amour sènso liberta.