Jeannette of Barbegal

Janetoun jouino e braveto, Qu’en la vesènt vous fai gau, La veguère risouleto Sus lou pont de Barbegau, Li pin gibla per lou vènt-larg Dins la vau souverto uso, Tout èro siau dins lou Grand-Clar Alin dins li moutouso - Mounte es que vas, bravo fiho. Ié diguère tout crentous, Soulo alin dins la ramiho, Sarié pas mau d’èstre dous. Te dirai que siéu palunié : A l’oumbrino di sagno, S’un languitòri te prenié, Te tendréu coumpagno. S’emé iéu vos faire bando, Un moumen arrèsto-te ; Dins ma bòri gaire grando, Lèu vau querre moun poudet. Faren de garbo de rousèu, De manoun de sarreto ; Te dounarai de bon counsèu Tout en gardant l’oumbreto. Vai-ten lèu dire à toun paire Que s’acò d’aqui ié vai, En palun iéu sabe un caire Qu’auren long-tèms de travai : Aperalin i’a de pavèu, Serviran pèr li bouto Que sènso acò lou vin nouvèu À pichot fiéu degouto. Mai d’uno semano entiero Crese que travaiaren. I’a ’n fasèire de cadiero Qu’en touto ouro lou veiren. Nous pagara fin-que d’un sòu Noste bèl estivage, E pièi après, se Diéu lou vòu, Faren un maridage. - Palunié, pode vous dire Que me fasès proun d’ounour ; Bessai me parlas pèr rire, Pau m’importo un tau discours. Tant soulamen vous respoundrai Qu’aier me siéu lougado ’M’un bèu jouvènt que vous retrais : Es dis Esperloungado.