Lament for my Roubin

Véniéu dis Antounello, De faire de cabus : Aprene la nouvello Que moun miòu l’aviéu plus. Me dison qu’un caraco, Qu’avié lou nas croucu, Dóu rastelié, destaco Roubin pèr dès escut. En intrant dins l’estable, De plus vèire aquéu miòu Tant dous e tant afable, Me sariéu tra pèr sòu ! Plus de douço pensado, Rèn pèr me faire gau ; Rebale moun eissado : S’es routo, m’es egau. Eu que dins la batudo Mis idèio sabié, Qu’aviéu pres pèr ajudo Dins lou gres di Clapié ! Eu qu’en tenènt la rego, Se mourdié lou margai, Sentié s’aviéu i brego Un refrin triste o gai. Quau t’aurié di, pecaire ! Dóu labour quand venian, Que tardèsses tant gaire, De viéure em’un boumian ! D’entèndre uno voues rauco, D’èstre priva de tout, E soulamen de bauco N’avé pas toun sadou! Verai que, dins la vido, Uno fes que sian vièi, Li benfa, tout s’óublido. Semble qu’acò ‘s la lèi ! Se vuei, pèr toun vieiounage, Mores de patimen, Qu’uno niue dins un sounge Iéu te vegue autramen ! Béu Roubin, se te plagne, Se n’ai de fernisoun, Ai res que m’acoumpagne En fasènt ma cansoun. Dins moun vièi païs d’Arle, Se pèr mas t’ai canta, Que de tu se n’en parle, Car l’as proun merita.