The Tower of Barbentane

I L’Evesque d’Avignoun, Mounsen Grimau, A fa basti ‘no tourre à Barbentano Qu’enràbio vènt de mar e tremountano E fai despoutenta l’Esprit dóu mau. Assegurado Sus lou roucas, Forto e carrado, Escounjurado, Porto au soulèu soun front bouscas: Memamen i fenèstro, dins lou cas Que vouguèsse lou Diable intra di vitro, A fa Mounsen Grimau grava sa mitro. II L’Evesque d’Avignoun, Mounsen Grimau, A chausi pèr clavaire de sa tourre Un crestian d’autre-tèms, Jan-Jóusè Mourre, Que jamai de sa vido a dich un mau. Bèu sant Sauvaire, Tenès d’à ment Lou bon clavaire ! Terrible afaire Vèn de lou metre en pensamen: Mourreto, sa chatouno, a ‘n parlamen, Un parlamen d’amour que pòu l’adurre A l’infèr tout dubert, pèr pau que dure. III “ L’Evesque d’Avignoun, Mounsen Grimau, De iéu que pensara, dis lou clavaire, S’apren que dins la niue vèngue un trevaire A l’oumbro de sa tourre faire mau ! Jan-Jóusè Mourre, Ai ! paure tu ! Te faran courre, E de la tourre Perdras li clau e la vertu, E li flourin papau tant bèn batu ! Estremas-vous amount, folo Mourreto: Vous empestelarai dins la tourreto. » IV « L’Evesque d’Avignoun Mounsen Grimau, Sa tourre a benesi, canto Mourreto; Car iéu, à miejo-niue, dins sa tourreto, Aurai moun calignaire... Ah ! pas pèr mau ! Mounto lèu, mounto, Moun bèl ami ! Alin tremounto La luno proumto, E lou clavaire es endourmi. Li roussignòu, avau, s’auson gemi... Vène, que, di merlet sus li dentello, Veiras à pèd cauquet dansa d’estello ! V L’Evesque d’Avignoun, Mounsen Grimau, A leissa crèlsse un èurre à sa muraio, Un èurre brancaru: dintre li raio L’a jita d’escoundoun l’Esprit dóu mau. De branco en branco Volo un jouvènt; L’èurre s’escranco E s’espalanco; Sèmblo que rounflo un cop de vènt... Es l’Amour que d’assaut pren lou couvènt; E, plourié d’alabardo emai d’enclume, Mounto que mountaras: elo fai lume. VI “L’Evesque d’Avignoun, Mounsen Grimau, Tourre proun auto a fa, dis l’escalaire. Pèr tu, cènt cop plus aut iéu fendriéu l’aire, Bello, sèns que lou cor me fèsse mau ! » Vers sa tourtouro Que respond plan, Au mai s’aubouro, Mai s’enamouro Lou courajous e dous galant. Enfin béu un poutoun tout tremoulant... Ai ! Diéu ! entre si man peto uno broco, Lou calignaire toumbo sus la roco. VII L’Evesque d’Avignoun, Mounsen Grimau, Dison que perdounè Jan-Jóusè Mourre; Mai d’avé benesi trop bèn sa tourre, Pietous dóu paure enfant, se vouguè mau. Iéu, de Mourreto Plagne lou sort : Car la paureto Dis amoureto Noun couneiguè rèn que la mort. Urous, éu d’un poutoun beguè soun cor; Elo, de miejo-niue quand dindo l’ouro, Encaro au tourrihoun s’entènd que plouro.